قصيده الرايه للشاعر ابو مالك رسام

يا بدايه في طريق الحب إلى ما لا نهاية = جيت لك من شوق من إحساس من فطرة سليمة
جيت لك من بعد ما عانيت ما فيه الكفاية = وانتزعت النصر بالإصرار من فك الهزيمة
مثل تايه في دروب الحب محتاج الهداية = غايته يلقاك والغاية ذرت فيه العزيمة
غايتي صرتي ولوما كان لي في الناس غاية = والعذاراء غادروا من بعد ما صرتي مقيمة
والله اني ما رسمت الحب أو شلته هواية = الزعامة لك وانا اللي ما عشقت إلا زعيمة
كل من قبلك هواهم وهم وان طالت رواية = فسريها كيف ما شفتي تفاسير الحكيمة
صرتي اولهم وأخرهم ومشوار البداية = ما عظيم إلا وله في الناس من حوله عظيمة
لكن الدنيا عليّ ما رست دور الغواية = كل ما لاحت شموس الوصل قامت لي غريمة
والظّروف اللي تحدتني حكايتها حكاية = لا تزال اليوم مسودّة على ذكرى قديمة
سالفة والله لا وراك اشبه بالوشاية = والوشاية طبّها يجرح ووخزتها أليمة
عزّرت فيني ليالي صار ذكراها نكاية = كن بعضي ضد بعضي يرتكب فيني جريمة
لا يصيبك شك في مدحي ولا مدحي دعاية = قلت فيك الصدق ثم النصح وابديت الظليمة
بعد ذاك الود صرتي ند في ثوب العناية = ما وقفتي عن طعونك واعتبرتيها غنيمة
بعض طعنات الهوى لو ما ثبت فيها جناية = تحت ضل الصبر مخفية ولو كانت جسيمة
لا يقام الجلد في الجاني ولا حد الرماية = طالما والجرح والجاني علاقتهم حميمة
والله اني ماذكرت إلا وطالعت المراية = كيف كنتي في جروحي يا قسى قلبك كريمة
لو نفيت الذنب ظاهر ما انتفى تحت العباية = خلف ذاك الضلع قلبٍ ما تبقى إلا هشيمه
شد لك في يوم كنه قد جباني لك جباية = كل ما جفت قفارك ما سمعت إلا هزيمة
لا تردي من نسج لك من خدود الورد راية = واستلذ الشوك لأجلك واعتبر نارِك نعيمة
والورود اللي لأجلك قد خلقها الله آية = لا رياح الشوق هزتها ولا جاها نسيمة
استغليتي حنيني تفرضي حق الوصاية = والألم جاوز حدود الصبر والحيلة عديمة
توقدي صمتي وترمي نار بعدك فوق نايه = ان تجاهلتك عزفتي وان ترجيتك عقيمة
ادري اني سقت بعضي وإن وبعضي جا سعاية = كل ما مديت حبل الوصل وسعتي صريمة
صوني القلب الحنون اللي تولاك الرعاية = واذكري رد الجمايل وان رد الجُمل شيمة
قدري معنا الصداقة واعدلي عند الولاية = واتركي للقلب خله لا دعاء السامر نديمة